NAPULE
(Testo in vernacolo napoletano)
Quann’’o Signore pittaje ’o munno
se divertett’ a mmiscà tutt’’e culure
e cu ddoje passate, senza jì a ffunno,
se ’nventaje ’e bbellezze d’’a natura.
’O mare, ’o sole, ’o cielo e ’e stelle
ascettero fòra comm’ a na magìa
e nascettero sti ccose tantu bbelle
’a tenè luntano ogni mmalincunìa.
Ma na goccia carette d’ô penniello
e s’ammiscaje cu ll’acqua ’e mare
facenn’addeventà chistu paiesiello
na rarità ca cercanno ’un ce sta pare.
Subbeto spuntàjeno sott’a ll’uocchie
Pusilleco, Surriento e Marechiaro,
bbellezze ca fanno tremmà ’e ddenocchie
e llèvano ’a pietto tutto ll’amaro.
’O sole se ferma e splenne ncielo
pe vestì ’e luce chistu paraviso,
’a luna se ’ncanta e squarcia ’o velo
pe gguardà meglio cu nu pizz’a rriso.
Chiunque passa e gguarda chesti ccoste
cu ’o panorama ca se perde a mmare
sùbbeto s’annammòra ’e chistu posto
sott ô sole o ’e sera cu ’e llampare.
Nata d’ô penniello ’e tant’ Artista
Napul’è proprio nu capolavoro.
Pirciò te cummuove a chesta vista,
e ddice: “Vide Napule e po’ muore”.
NAPOLI
(Testo in italiano)
Quando il Signore dipinse il mondo
si divertì a mescolare tutti i colori
e con due pennellate, senza andare a fondo,
realizzò le bellezze della natura.
Il mare, il sole, il cielo e le stelle
uscirono fuori come una magia
e nacquero queste cose tanto belle
da tenere lontano ogni malinconia.
Ma una goccia cadde dal pennello
e si mescolò con l’acqua di mare
facendo diventare questo paesino
una rarità che a cercare non c’è pari.
Immediatamente spuntarono sotto gli occhi
Posillipo, Sorrento e Marechiaro,
bellezze che fanno tremare le ginocchia
e tolgono dal petto tutto l’amaro.
Il sole si ferma e splende in cielo
per vestire di luce questo paradiso,
la luna si incanta e squarcia il velo
per guardare meglio con un sorriso.
Chiunque passa e guarda queste coste
col panorama che si perde nel mare
subito si innamora di questo posto
sotto il sole o di sera con le lampare.
Nata dal pennello di cotanto Artista
Napoli è proprio un capolavoro.
Perciò ti commuovi a questa vista
e dici: “Vedi Napoli e poi muori”.
