N

N

Lu falareddu

Quarantaquattru l'anni chi passaru
d''u jornu chi me matri fici a mia,
chi pozzu diri, parsi chi vularu

lassannu 'u surcu e la malincunia. 
Assuma lu ricordu paru paru
d''u falareddu chi me matri avia,
di quannu, nicu nicu, pi riparu
di sutta e sutta, iu, mi ci mittia.

"Di cu' ti scanti, parra figghiu beddu!"
È chistu chi me matri mi dicia;
mi dava na carizza e un vasuneddu
e tra li vrazza dopu mi strincia.
Agghiummuniatu nta lu falareddu
tuccava stiddi e luna e poi scinnia,  
vulava 'n celu comu fa un aceddu, 
pi chistu di ddà sutta 'un mi muvia.

Mi trovu granni, un omu già maturu
e nun c'è nuddu chi mi varda 'a via,
mi sentu comu fussi nuru e cruru
cu l'armicedda, a voti, chi pinia.
Cercu la vita ma chi trovu? Un muru
e spissu la me testa smacinìa
chi m'addisiassi ancora, vi lu giuru,
ddu falareddu chi m'agghiummunìa.

Nino Barone

Biografia: http://www.messinaweb.eu/homepage/le-nostre-iniziative/arteincentro/2016/artisti-partecipanti/item/2981-nino-barone.html