ribb’ô-mari

Un pomeriggiu senza ventu,

pi Missina cosa rara,

a piscari mi-nn’annai.

Un mari lìsciu com’a-ll’ógghiu,

pulitu e trasparenti

unni pisci ci-nn’è tanti.

Ddu lenzi iò piazzai

e mi misi a passiari

pinzannu a Colapisci,

’nta ’ddu bbrazzu ’i mari

chi Scilla e Cariddi pasci.

Mi sintia salutari, mi girai

e visti un cristianeddu

c’un cappeddu ’i pàgghia supra ’a testa,

’na cammìcia a ciuri,

un pantaloncinu iancu

e un paru ’i scappi ’i tennisi dû stissu culuri.

«Chi fannu, manciunu?», mi dissi.

«Chi pigghiasti? Chi-ssi’, missinisi?»

«Missinisi e mi-nni vantu», ci dissi, «ma tu cu si’, chi-ddici?».

E vaddannulu ’nta-ll’occhi,

un passu arreti ’i sissant’anni fici.

’A nostra scola media ni ricuddammu,

non mi paria veru,

e comu ddu frati n’abbracciammu.

Lillo Busà

Biografia: http://www.messinaweb.eu/homepage/le-nostre-iniziative/arteincentro/2016/artisti-partecipanti/item/2993-lillo-busa.html